熱門文章

2018年1月12日 星期五

媽媽生日之旅@珠海長隆2017 Day 1

做左媽媽之後去邊都係以Alien為主,今年嘅生日之旅就揀左珠海長隆海洋王國。


珠海長隆嘅package好多地方都有得買,而我地今次就揀左中旅社。因為我地呢啲屯門之友,喺返屯門上船比較方便,而呢啲咁嘅日子得中旅社可以喺網上一次過攪掂晒。
媽媽一早起身去邊呀? 我仲想瞓覺.....
套票:企鵝酒店(包早)+單園遊(2日門卷)+自助晚餐+屯門<->澳門來回船飛(2大1小 - 滿一歲就要買船飛,好貴😣😣)

日期:2017年12月31日 - 2018年1月1日
酒店:珠海長隆企鵝酒店 -温帶雙床房
交通:屯門->澳門港外碼頭 TurboJet 9:10船
            澳門港外碼頭 - >關閘 3A巴士 約20分鐘
            大約用左20分鐘就過完關,一出嚟就會見到拱北地下商場,去長隆嘅巴士(K10)係喺
            -1/F其實有啲難揾,網上資料話喺歧關巴士總站,但原來係對面方向,而且喺-1/F係

            過唔到對面線,又要上返去揾個中旅社巴士站嘅電梯再落去
企鵝酒店同海洋王國真係超近,而且大電視下面果個位就係食街,真係超級方便
12:35終於到左今次旅程嘅目的地,第一件事緊係放低行李,食啲嘢就入場啦。喺呢啲大時大節其實都冇預左佢會咁早比到房我哋,估唔到又有喎。仲可以用一百蚊upgrade向住海洋王國嘅房,今晚12點可幾睇煙花!!(其實唔係因為就Alien要瞓覺,我都唔會比一百蚊~~~直接入場睇 - 無錯!!今日除夕,樂園係開到00:30。)


我要自己開門! 


房比我想像中細......上次廣州長隆大好多!!


價值一百個大洋嘅樂園景!!
條住客專用通道會經過企鵝餐廳 (今晚晚餐+聽朝早餐嘅地方),行到尾左手邊落去就係美食街,右手邊落去就係海洋王國入口!!

企鵝酒店住客專用通道 ,直達樂園只需5分鐘

雖然話係美食街但只係啲普通嘢,唔算太吸引,價錢嚟講一碗淨雲吞50,係獨市嚟講都可以接受嘅。








淨雲吞好好食,馬拉糕同Daddy碗麵就麻麻

睇下去邊個館先! 
如果有小朋友同行,要他他條條咁行晒所有館,睇埋表演,兩日票係必需嘅!!其實園區唔算大,如果拉條直路由頭行到尾,其實5-10分鐘行晒。雖然今日係除夕,不過都唔算多人,除左睇白鯨表演排左半個鐘,其他都唔洗排。(利申: 冇玩過任何機動遊戲,應該都要排下,不過眼見唔長龍)


白鯨表演係最多人睇,我地早半個鐘去排隊都要坐到好後,如果要坐好位可能真係要早45分鐘排隊。


白鯨表演





鯨鯊館

 
企鵝飛飛飛
海豚表演
又攰又曬,遮住瞓下先
晚餐時間5:30就開始,不過香港人真係唔慣咁早食飯,我地7點先開始經返果條住客專用通道去企鵝餐廳。好多人都等緊第二輪入席,好彩餐廳都叫大,等左15分鐘就可幾入去。
喺門口排完隊安排入到去之後,都係要自己揾位,真係有啲失望。不過全靠Daddy揾到個好位,可以對住企鵝食嘢,Alien又可以去睇企鵝!!
意大利=PIZZA + 意粉









餐廳門口就個小小嘅遊戲角,Alien玩到唔捨得走!!






























































































































 

 































































































































2017年4月30日 星期日

親親小動物之深圳野生動物園半天遊

Daddy一直都係團購之友,上個月見到有深圳野生動物園門票嘅團購。2張門票由$490減到$168,仲可以復活節用,又點可以錯過心。


不過復活節心血來潮去左廣州,之後我又要去美國工幹完全唔記得左呢兩張飛。直到Daddy閒逛團購時見到,到期日係4月30日,當然唔可蝕比佢,就30號去啦!!


由香港去深圳動物園其實都唔算好遠--(對屯門元朗人黎講)--分分鐘仲近過我返工。
深圳動物園最近深圳灣口岸,過左關搭的士20分鐘到就到。
不過我呢啲喺深圳有頭住家嘅,緊係早一日返上去hea下,第二日hea住咁出發啦。


我地游游閒閒瞓到自然醒食埋個晏先慢慢出發。由屋企到動物園都係半個鐘多少少,大槪點半就已經去到。


去到第一件事就係去換返張飛入場~~~入到去喺售票處嘅左手邊有個遊客服務中心。
雖然係五一黃金周,但人都唔算多,好快就換到張飛。
不過要留意,裡面係冇人排隊,甚至有人係counter後面個窗打尖。。。真係無奇一有!!




平時去動物園入到去首先要拎表演時間表,總係覺得睇晒啲表演先最抵。
今次係Alien第二次去動物園(第一次係長隆,不過果時只得8個月成舊飯咁咩都唔識),依家識行識走唔想趕頭趕命,諗住放佢自己落地想行去邊就行去邊,所以決定只係睇海洋表演(海洋表演時間: 一至五-12:30/14:00/16:30 六、日及假日- 12:30/14:30/17:15),然後hea遊。

其實Alien只係睇到佢地跳出水面嘅時候,喺水底嘅因為距離太遠一概睇唔到
建議早少少入去揾個靚位!!
自由自在跑嘅小朋友係最開心!!
放晒嘅電Daddy同媽媽都會好開心 !!

 
 
 

 

 
 
 



不負責任評分 - ❤❤❤❤


深圳動物園比起長隆行得舒服嘅,可能冇咁多人。
入面你諗到想睇嘅動物都有,大人小朋友都好開心。Alien見到好多平時只係喺書先見到嘅小動物,每一樣對佢黎講都好似好熟但又好新奇。
佢地方其實都幾大,如果小朋友鍾意抱多過行,建議買定遊覽車飛,行到攰又見到有車就可以跳上去,到想行嘅時候叫落車就可以。
另外佢有個小小嘅水上樂園比小朋友玩,有興趣可以帶定多套衫褲去玩完換。
我地行到6點到開始慢慢揾返個出口走人,雖然仲有啲地方冇去到,有啲動物未睇到,但都夠皮。$168兩個人真係抵到爛!!!
大家快啲揾下有團購又就到時間一定要去下,唔想即日來回嘅,附近都有好多旅館/酒店,可以上ctip睇下。



2017年4月21日 星期五

廣州復活之旅2017 - Day 2 and 3





叫得做復活之旅,緊係要有咁HEA得咁HEA。
首先要做嘅就係瞓到自然醒!!
講就講要自然醒,但慣左早起返工嘅Daddy9點就醒左。。。(媽媽我仲想瞓囉 ㅠㅠ)


雖然酒店有包早餐,但只係去到9點,太早喇~~~完全配合唔到我地HEA嘅主題,所以放棄左。(早知叫Daddy唔食都去影下有啲咩,咁就可以同大家報告下 --- 可惜)


原本諗住去上下九行一陣再睇下有咩啱食,點知行下行下比我哋見到個靚靚商場 - 西城都薈
行到大汗搭細汗,一見到個商場Daddy對眼即時發晒光,第一時間就衝左入去過冷河。




西城都薈
地址:黃沙大道8號(黃沙地鐵站上蓋)





西城都薈入邊食肆都幾多,為左唔想咁快出去熱過而且Alien又有啲眼瞓,就決推住車仔喺商場嘆住冷氣揾食。呢個時候當然又係開個大眾點評睇下啲人有咩推介。









Option:
1. 純再餐廳 - 廣東菜 (評語最高,餐牌最吸引客人食緊嘅亦最似樣,但要等78張枱)
2. Thank You mom - 韓國炸雞 (韓國嘢係我至我💚💚💚💚,等20張枱)
3. 37.2越南廚房 - 越南菜 (唔洗等而評語又唔差)





監於越多人爭越好味嘅原則,純再餐廳同Thank you mom我哋都有拎飛。



呢到要離一離題讚下we chat嘅排隊提示工能 -
其實佢係一個叫“美味不用等”嘅餐廳互聯網平台,可以訂位,點菜,埋單同排隊提示。
不過我廢事登記咁多大陸APP,所以通常喺we chat到用。
拎到飛之後開we chat直接scan飛上面嘅QR code就得,超級簡單。
拎左飛SCAN左之後我哋就可以一邊行街一邊等位,差唔多到先行返過去,方便到爆,特別係Alien冇耐性等位,要推佢四圍望嘢,有左佢就唔怕過左冇得食!!



講返我哋嘅午餐,最後就緊係Thank you mom快啲有得食啦!!

媽媽拿手原味雞
媽媽拿手醬香雞
 
 
Alien瞓得舒服我哋食得舒服
難得Alien瞓左~~Daddy同媽媽可以二人世界

其實之前去廣州做嘢嘅時候,同事都帶過我去海心沙分店食過一次,已然有好感,今次再見到,更係要食多次啦。雖然冇韓國咁好食,不過絕對可以止渴。職員都好有禮貌亦好幫手,見到有BB車都會安排啲闊少少嘅位,又會拉開啲櫈比我哋推架BB車埋枱。可能平時返開大陸見慣啲真係差到爆嘅service,佢地做多少少我就好滿意(證明我個人都好隨和姐😁)

Thank you mom - 不負責任評分

媽媽拿手原味雞 - ❤❤❤
媽媽拿手醬香雞 - ❤❤❤❤
環境 - ❤❤❤
服務 - ❤❤❤❤
總分- ❤❤❤❤




食飽緊係行下消化下啦,於是我哋又返去上下九,Daddy嘅目標係短褲,我就冇咩目標,見到想買就買!


行街冇咩好影。。。由於時間嘅關係,又到左食晚飯嘅時間。


晏晝食唔到純再餐廳,Daddy唔甘心,於是夜晚再去多次。今次好少少,只係等28張枱,呢個時候又要出動we chat嘅排隊提示功能。




行左一陣we chat 陣到咁上下,行返去又開餐喇!!




       
        
呢間餐廳多人等真係冇錯,因為真係好味,環境又夠闊落 -->雖然係卡位但都可以放好多碟餸。我哋點左雲吞雞煲翅、支竹雜菇白菜煲 -->呢個係為Alien而設、蝦+蟹籽粉絲煲、叉燒包(由左上至下)

純再餐廳 - 不負責任評分

雲吞雞煲翅 - ❤❤❤
支竹雜菇白菜煲 - ❤❤❤❤ (清啖啱晒Alien)
蝦+蟹籽粉絲煲 - ❤❤❤❤ (好嘢味,係得3隻蝦少左啲囉)
叉燒包 - ❤❤❤❤ (超好味,喺香港要食到呢個質數嘅都少,為左呢個包,一定要再去)
環境 - ❤❤❤❤
服務 - ❤❤❤
總分- ❤❤❤❤


食飽飽又係時候帶Alien返酒店休息,有左嚟嘅時候嘅經驗,回程緊係要訂定飛。
不過都係蝕左25人民幣一個人,因為顯示得返最後兩個位,而且聽日就走~~~~~一定要比個特快出飛手續費😭😭,如果想坐高鐵嘅話,記住要早啲訂飛呀!!


最後一日~~~冇咩特別嘢做又係瞓到自然醒,去醫肚然後行下北京路步行街。


由酒店去地鐵站只係行5分鐘到,好方便!不過去北京路要轉線,喺大陸轉線唔似香港對面就係,推住架車上上落落就有啲煩。所以各位如果推車就諗好去邊,住喺啲盡量唔洗轉線嘅地鐵站附近。


去到北京路站,又係揾食嘅時間~~~
北京路步行街出口,就有個美食廣場,一直對大陸嘅美食廣場都冇咩好感,不過Daddy話要去睇下,就完個心願啦。點知一入去有個小suprise~~~~其實呢個美食廣場唔係一堆食肆自己買嘢食拎去中間自己揾位,而係幾間唔同食肆開係隔離,而且啲食肆都好開陽好乾淨 --> 可能係大陸地方大。


最後我地揀左食羊肉 - 清真高原姑娘牛肉面(北京路店)
地址: 北京路168号粤海仰忠汇负二层F004铺






清真高原姑娘牛肉面(北京路店)- 不負責任評分

大牛肉面 - ❤❤❤(普通,冇咩特別,食前要去下油)
招牌牛肉 - ❤❤❤ (辣度啱啱好)
羊扒串燒 - ❤❤❤❤ (好嘢味,有啲軟骨咬下)
羊肉串燒 - ❤❤❤❤ (好好味,夠淋)
環境 - ❤❤❤❤
服務 - ❤❤❤❤(一坐低就拎左張BB櫈嚟,我出左去買包包比Alien,職員見Daddy湊住Alien行唔開拎嘢食,主動幫手拎)
總分- ❤❤❤❤


食飽飽散下步~~~
 

Daddy媽媽你哋有黑眼鏡,我曬到開唔到眼喇!

開心嘅時間過得特別快~~~~係時候去坐高鐵LU~~
玩左幾日好攰呀!!



2017年4月20日 星期四

廣州復活之旅2017 - Day 1

一直只會係FACEBOOK紀錄Alien嘅嘢,但有陣時又想記得詳細啲(好似今次廣州之旅咁),所以開左呢個Blog。




講返今次廣州呢個短TRIP,只係想帶住Alien出走,所以冇特別編排行程(其實帶住BB都好難跟行程行~~~)


日期: 2017年4月14日- 2017年4月16日
地點: 廣州上下九步行街、西城都薈、北京路
酒店: 玉城酒店 (經永安網訂房)


原本計劃由深圳福田高鐵站去廣州南站,因為車程只係需要半個鐘啱晒冇耐性嘅Alien。點知喺前一晚上網仲有大把位,去到車站最早嘅航班竟然要夜晚7點幾。唉~~~~真失察!!為左慳幾蚊CTRIP啲網上出票費最後就蝕左幾個鐘玩嘅時間。。。所以奉勸各位,有啲錢真係唔慳得,記住訂左飛先!!


最後買左2:36分由羅湖開嘅火車,見有時間就係福田站個地下商場行下先搭地鐵去羅湖。
終於入到候車室(仲諗住大陸唔係假期,可以輕鬆遊。。。)





今次好遲先決定去,加上遇上廣交會,可以選擇嘅唔多(慳媽我亦唔想訂太貴嘅酒店~~~)

所以CHEAP CHEAP咁訂左呢間 - 玉城酒店

去到酒店都已經5點,Alien都頂唔住瞓左

係就係舊左少少,不過都算就腳,距離長壽路地鐵站同上下九步行街只有5分鐘路程,附近又有個西城都薈(大槪10分鐘到),如果帶住小朋友怕食街邊小店,西城都薈入面有好多似樣嘅食肆,我地都係到食左兩餐。
酒店位於康王中路嘅珠寶城7樓,都算係條大街,而且好多人喺珠寶城賣買貨,就算一個人出入都唔係太大問題,除左地毯太舊又有煙頭燒過嘅痕跡(但好彩又冇煙味~~~),其他都可以接受。至於員工,服務出奇地好,係大陸少有。喺我地寄存行李嘅時候見我地有BB又推住車又有行李,主動問要唔要預先幫我地安排定的士,又幫我地預返火車時間幾點應該上的士,當然會比自己落樓下伸手貴少少,不過都係可接受範圍(由酒店去廣州南站連路費 - 90人民幣)。我地行完街返到酒店,酒店職員已經拉等我地行李拎埋兩支水,送我地去B1停車站確保我地上啱的士,仲抄低埋車牌司機名。至於車費,係到站之後我地直接比司機。

休息左一陣,我地就出發去食自助餐 -- Daddy要求。
本來諗住去四海一家,但因為冇火車飛,改左喺廣州東站落車,如果再去返番禺果邊好唔方便。所以喺火車到即刻開左大眾點評(大陸OPEN RICE)黎睇下仲有咩其他選擇。
最後揀左喺越秀賓館嘅紅棉,一來喺大眾嘅評價都算OK二來有團購 - 138人民幣一位。





地方比我想像中細,可能個心入面一路都諗住四海一家。我地訂左6點中,但繁忙時間一直冇的士,所以遲左成半個鐘,好彩唔爆。一上到去,經理仲係咁話冇問題冇問題,即刻安排左一個闊落嘅地方比我地坐,等我地泊低嘅BB車,又好快拎左BB櫈比Alien。喺大陸食自助餐都預左要同大媽爭魚生爭蟹腳,但呢到竟然出奇地唔需要。經理喺隔離睇住,個盤一唔滿就叫人切三文魚,蟹腳一冇就叫人拎。至於食物質數,雖然冇驚喜,但係以呢個價錢呢講我可以接受,at least魚生都夠生鮮,飲品除左咖啡茶水,仲有紙包嘢飲,又有雪糕,仲送左一人一盅好好味嘅燉湯。
食完之後都9點LU,Alien周車勞頓左成日,廢事再操佢,直接返酒店休息。